NATO po shqyrton mundësinë e ndërmarrjes së veprimeve për të garantuar lirinë e lundrimit në Ngushticën e Hormuzit, nëse rruga ujore e bllokuar nuk çlirohet deri në fillim të korrikut.

Bloomberg raporton se ideja ka mbështetje nga disa vende anëtare, por konsensusi i nevojshëm ende nuk është arritur.

Vendimi pritet të diskutohet në takimin e udhëheqësve të Aleancës në Ankara më 7 dhe 8 korrik. Komandanti Suprem i Forcave Aleate për Evropën, Alexis Grinkevich, tha se “së pari përcaktohet drejtimi politik dhe më pas vijon planifikimi formal”, duke pranuar se po mendon seriozisht për këtë opsion.

Një ndërhyrje e tillë do të sinjalizonte një ndryshim të dukshëm në strategjinë e Aleancës ndaj konfliktit SHBA-Izrael-Iran, pasi deri më tani aleatët kanë insistuar se do të përfshihen vetëm pas përfundimit të luftës dhe nëse formohet një koalicion i gjerë me vende jo-anëtare të NATO-s. 

Mbyllja e Ngushticës, përmes së cilës kalon rreth një e pesta e furnizimeve botërore me naftë dhe gaz natyror të lëngshëm, ka shkaktuar rritje të çmimeve të energjisë dhe rënie të parashikimeve të rritjes ekonomike.

SHBA ka kërkuar ndihmën e aleatëve për hapjen e kalimit, por shumë vende evropiane kanë refuzuar. Presidenti Donald Trump ka reaguar me zemërim, duke njoftuar tërheqjen e 5,000 trupave nga Gjermania dhe duke kërcënuar me sanksione ekonomike. 

Qëndrimet e vendeve anëtare mbeten të ndara. Spanja ka kundërshtuar hapur luftën dhe ka ndaluar SHBA-në të përdorë hapësirën ajrore dhe bazat e saj për sulme ndaj Iranit.

Franca dhe Mbretëria e Bashkuar kanë krijuar një koalicion të veçantë brenda NATO-s për të siguruar transportin detar në Hormuz, pasi konflikti të qetësohet, ndërsa disa vende të tjera kanë dhënë në heshtje qasje në bazat e tyre për mbështetje logjistike. Megjithatë, një pjesë e aleatëve mbeten të ngurruar për t’u përfshirë drejtpërdrejt në konflikt. 

Edhe pse SHBA nuk ka bërë ende një kërkesë zyrtare për përfshirjen e NATO-s, presioni mbi Aleancën po rritet.

Nëse bllokada vazhdon, disa vende pritet të ndryshojnë qëndrimin dhe të mbështesin një mision të përbashkët për të garantuar kalimin e sigurt të anijeve tregtare. Kujtimi i dështimit të operacionit amerikan “Projekti Liria” mbetet një paralajmërim për vështirësitë që mund të shfaqen, duke e bërë vendimmarrjen e ardhshme të NATO-s edhe më delikate. 

/rtsh.al/