Aleanca Veriatlantike njoftoi këtë të hënë se rreth 200 trupa të Forcës Aleate të Reagimit do të dislokohen për herë të parë në Kosovë dhe në Maqedoninë e Veriut. Stërvitja, që do të zgjasë nga 30 shtatori deri më 16 tetor, synon të testojë gatishmërinë e trupave dhe mbështetjen për KFOR-in në rast nevoje.

Në Kosovë do të dislokohen 50 trupa dhe 150 të tjerë në Maqedoninë e Veriut. NATO tha se dislokimi i këtyre forcave jep një mesazh të qartë të vendosmërisë të fortë të Aleancës ushtarake dhe përkushtimit të saj për të ruajtur paqen dhe stabilitetin në rajon, por edhe aftësinë e aleancës dhe gatishmërinë për t’u përgjigjur në çdo situatë.

Sipas NATO-s, Forca Aleate E Reagimit, e krijuar në korrik të këtij viti, është një forcë strategjike e gatishmërisë së lartë me aftësi të shumë fusha. Kjo forcë mund të dislokohet shpejt dhe mund të ofrojë ndihmë në mbrojtje në rrethana të ndryshme.

/RTSH/