Në Galerinë e Artit Pamor “Nikolet Vasia” në Durrës është hapur ekspozita personale e artistes Emjona Stasi, me titull “Ndjesi”, kuruar nga Suzana Varvarica Kuka.

Ekspozita paraqet një përzgjedhje veprash që përmes ngjyrave dhe kompozimeve përcjellin qetësi, harmoni dhe reflektim të brendshëm.

Në  ekspozitën e saj të shtatë vetjake artistja ka ardhur ndryshe, duke përdorur guralecë të mbledhur në gjirin e Durrësit për të krijuar peizazhe dhe portrete që shprehin emocionet e saj.

“E gjithë puna ime është një ndjesi dhe unë kështu e konceptoi dhe mu duk që ky titull i shkonte më së miri. Gati gjysma e ekspozitës është e krijuar me guralec të mbledhura në bregdetin e Durrësit”, tha ajo.

Emjona Stasi është pjesë e skenës artistike që prej vitit 1977, me mbi 50 ekspozita brenda dhe jashtë vendit.

Punimet e saj gjenden në Galerinë Kombëtare të Arteve, në Galerinë e Durrësit dhe në koleksione private në disa vende të botës. Ekspozita “Ndjesi” do të qëndrojë e hapur deri më 26 tetor.

/rtsh.al/