Drejtues të lartë të Policisë së Shtetit janë emëruar dhe transferuar në funksione të reja në kuadër të ndryshimeve në strukturat vendore dhe qendrore të policisë.

Sipas vendimeve të fundit, Drejtues i Parë Kastriot Skënderaj është emëruar në detyrën e Drejtorit të Drejtorisë Vendore të Policisë Elbasan, duke marrë drejtimin e strukturës vendore të rendit në këtë qark.

Në të njëjtën kohë, ndryshime janë bërë edhe në drejtimin e Drejtorisë Vendore të Policisë Elbasan. Drejtues Fatmir Hoxha, i cili mbante detyrën e Drejtorit të kësaj drejtorie, është emëruar Specialist në Drejtorinë për Integrimin në Drejtorinë e Përgjithshme të Policisë së Shtetit (DPPSh).

Ndryshime ka pasur edhe në strukturat e Policisë së Shtetit në juglindje të vendit. Drejtues Luigj Vathi, nga detyra e Drejtorit të Drejtorisë Vendore të Policisë Berat, është emëruar Drejtor i Drejtorisë Vendore për Kufirin dhe Migracionin Korçë.

Ndërkohë, Drejtues Gëzim Zhupaj është transferuar nga detyra e Drejtorit të Drejtorisë Vendore për Kufirin dhe Migracionin Korçë dhe është emëruar Shef Sektori në Departamentin për Rendin dhe Sigurinë Publike në Drejtorinë e Përgjithshme të Policisë së Shtetit.

Një tjetër ndryshim prek strukturat e rendit në kryeqytet. Kryekomisar Dashnor Muhaj, i cili mbante detyrën e Zëvendësdrejtorit për Rendin dhe Sigurinë Publike në Drejtorinë Vendore të Policisë Tiranë, është transferuar dhe emëruar Specialist për Migracionin e Parregullt në Departamentin për Kufirin dhe Migracionin në DPPSh.

/rtsh.al/