Bashkimi Evropian ka ndarë kontributin e parë financiar prej 10 milionë eurosh për të mbështetur Tribunalin Special që po krijohet për të hetuar dhe gjykuar krimet e agresionit të Rusisë kundër Ukrainës. Ky tribunal po ngrihet nën kujdesin e Këshillit të Evropës.

Përfaqësuesja e Lartë e BE-së për Punët e Jashtme dhe Politikën e Sigurisë, Kaja Kallas, e njoftoi këtë financim mbrëmjen e sotme krahas nënshkrimit të një marrëveshjeje me Këshillin e Evropës.

“BE-ja ka dhënë 10 milionë euro të parat për një Tribunal të ri Special për të ndjekur penalisht udhëheqësit rusë për rolin e tyre në luftën e Moskës kundër Ukrainës. Udhëheqësit e Rusisë janë përgjegjës për këtë luftë dhe ata duhet të mbajnë përgjegjësi. Nuk mund të ketë pandëshkueshmëri” tha Kallas.

Ky njoftim vjen pas kritikave nga presidenti i Ukrainës, Volodymyr Zelensky gjatë Forumit Ekonomik në Davos, ku ai qortoi partnerët ndërkombëtarë për ritmin shumë të ngadaltë për të vendosur praa drejtësisë Vladimir Putin dhe dënuar krimet e luftës ruse kundër Ukrainës.

Marrëveshja për krijimin e këtij Tribunali Special u nënshkrua në qershor 2025 mes Ukrainës dhe Këshillit të Evropës (në Strasburg).

/rtsh.al/