Shqipëria dhe Sllovenia kanë hedhur hapin vendimtar drejt njohjes reciproke të pensioneve dhe të drejtave të punësimit. Pas negociatave intensive të zhvilluara në Tiranë nga data 2 deri më 4 shkurt, të dyja palët kanë përmbyllur me sukses raundin e dytë dhe të fundit, duke bërë të mundur parafirmosjen e marrëveshjes.

Lajmi u bë i ditur nga Zëvendësministrja e Ekonomisë dhe Inovacionit, Olta Manjani, e cila kryesoi delegacionin shqiptar. Ajo theksoi se dokumenti i dakordësuar me palën sllovene, të kryesuar nga Mojca Pršina Kumar, garanton mbrojtjen e të drejtave të qytetarëve sipas standardeve të Bashkimit Evropian.

Çfarë përfitojnë qytetarët?

Kjo marrëveshje është një lajm i mirë për mijëra shqiptarë që jetojnë dhe punojnë në Slloveni, si dhe për qytetarët sllovenë në Shqipëri.

Përfitimi kryesor është bashkimi i periudhave kontributive. Kjo do të thotë se vitet e punës në njërin shtet nuk do të humbasin, por do të llogariten së bashku me vitet e punës në shtetin tjetër për efekt pensioni.

Në fushën e punësimit, marrëveshja siguron akses më të lehtë dhe trajtim të barabartë në tregun e punës të të dyja vendeve.

“Qytetarët do të përfitojnë nga bashkimi i periudhave kontributive, duke siguruar që vitet e punës të mos humbasin,” shkruan Manjani në rrjetet sociale.

Marrëveshja me Slloveninë i shtohet listës së gjatë të negociatave diplomatike në fushën e sigurimeve shoqërore. Që nga viti 2005, Shqipëria ka nënshkruar rreth 28 marrëveshje të tilla.

/rtsh.al/