Shqipëria ka mbyllur vitin 2025 me më shumë se 1.04 milionë mjete rrugore të regjistruara, duke shënuar një zgjerim të dukshëm prej 9,3% krahasuar me vitin paraprak. Raporti më i fundit i Institutit të Statistikave (INSTAT), i bazuar në të dhënat e Drejtorisë së Përgjithshme të Shërbimeve të Transportit Rrugor (DPSHTRR), zbulon se autoveturat vazhdojnë të mbeten mjeti kryesor i udhëtimit për shqiptarët, duke përbërë mbi 80% të totalit të inventarit në vend.

Së bashku me rritjen e nivelit të motorizimit në shkallë kombëtare — i cili ka arritur në 361 autovetura për çdo 1.000 banorë — të dhënat pasqyrojnë edhe hapat e parë të tranzicionit drejt mjeteve ekologjike.

Tiranë dhe Durrës, qendrat e motorizimit në vend

Shpërndarja gjeografike e mjeteve konfirmon përqendrimin më të lartë në zonat qendrore dhe ekonomikisht më të zhvilluara të vendit. Qarku i Tiranës mban peshën kryesore të parkut automobilistik, me mbi një të tretën e të gjitha mjeteve rrugore (34,7%), i ndjekur nga Durrësi me 13,6% dhe Fieri me 9,1%.

Megjithatë, vendin e parë për densitetin e mjeteve për frymë e mban Durrësi, i cili udhëheq me nivelin më të lartë të motorizimit në Shqipëri.

“Qarku i Durrësit ka nivelin më të lartë të motorizimit në vend, me 535 autovetura për 1.000 banorë.”, thuhet në raportin e INSTAT, “Statistikat e Karakteristikave të Mjeteve Rrugore 2025”.

Moshë e madhe teknologjike dhe dominim i naftës

Për sa i përket karakteristikave teknike, tregu shqiptar i makinave vazhdon të mbizotërohet nga mjetet e përdorura dhe karburantet tradicionale. Nafta mbetet lënda djegëse kryesore për 72,1% të autoveturave, ndërsa kambio manuale përbën 55,9% të totalit të mjeteve.

Të dhënat tregojnë se më shumë se gjysma e parkut të mjeteve (55,3%) i përket periudhës së prodhimit 2000–2010, ndërsa autoveturat e moshës 11 deri në 20 vjeç përbëjnë 45,7% të totalit. Në garën e markave, preferencat e shqiptarëve mbeten pothuajse të ndara mes dy gjigandëve gjermanë: Volkswagen udhëheq tregun me 19,7%, i ndjekur nga afër prej Mercedes-Benz me 18,1%.

Pavarësisht moshës mesatare relativisht të lartë të mjeteve, viti 2025 ka shënuar një rritje mjaft dinamike në sektorin e makinave elektrike. Sipas shifrave të publikuara nga INSTAT, numri i autoveturave elektrike është rritur me 91,2% brenda një viti.

“Numri i autoveturave elektrike u rrit me 91,2 %, krahasuar me vitin 2024.”, thekson INSTAT.

Ky dyfishim i pronisë së mjeteve elektrike tregon një prirje të re drejt modernizimit të transportit rrugor, ndonëse ato ende përbëjnë një pjesë të vogël në krahasim me të gjithë inventarin kombëtar.

/rtsh.al/