Vënia e një kryqi në kullën qendrore të Jezu Krishtit shënon edhe inaugurimin përfundimtar të bazilikës Sagrada Familia në Barcelona. Pas 144 vitesh në proces ndërtimi, tashmë ajo ka rritur lartësinë në 172.5 metra, duke e bërë atë kishën katolike më të lartë në botë.

Në ceremoninë e parashikuar do të marrë pjesë Papa Leo XIV, i cili do të drejtojë edhe meshën solemne. Ati i Shenjtë mbërriti në Barcelonë në udhëtimin e tij apostolik në Spanjë dhe takimi i parë në publik u zhvillua në Katedralen e Kryqit të Shenjtë dhe Shën Eulalia, selia e kryepeshkopatës së Barcelonës.

Mijëra besimtarë që kishin mbushur sheshin e përshëndetën Papa Leon, ndërsa kambanat ranë në shenjë festimi dhe fjalimin Ati i Shenjtë e nisi katalanisht.

Kjo ditë shënon edhe 100-vjetorin e vdekjes së Antoni Gaudít, arkitektit vizionar të bazilikës, por edhe të shumë objekteve të tjera në Barcelonë.

Sagrada Familia është një simbol universal i fesë, artit dhe identitetit të Barcelonës, që çdo vit mirëpret mbi 5 milionë vizitorë nga mbarë bota, duke gjeneruar rreth 34 milionë euro të ardhura dhe duke mbetur një nga destinacionet kulturore e shpirtërore më të rëndësishme në Evropë.

Tempulli Sagrada Familia është një kryevepër e arkitektit katalanas Antonio Gaudí, i cili është frymëzuar nga tre libra për të konceptuar bazilikën: Libri i Natyrës, Libri i Shkrimit të Shenjtë dhe Libri i Liturgjisë.

/rtsh.al/