Partia Demokratike ka depozituar zyrtarisht një kërkesëpadi kundër Komisionit Qendror të Zgjedhjeve (KQZ), duke kërkuar shfuqizimin e një akti që rregullon votimin në Institucionet e Ekzekutimit të Veprave Penale (IEVP).

Në qendër të këtij debati juridik është Vendimi nr. 6, i datës 14 prill 2026, i marrë nga Komisioni Rregullator i KQZ-së. Ky vendim përcakton rregullat për krijimin e qendrave të posaçme të votimit dhe hartimin e listave të zgjedhësve brenda burgjeve.

Sipas paditëses (PD), ky akt është “i kundërligjshëm dhe antikushtetues”, duke pretenduar shkelje të neneve kryesore të Kushtetutës dhe Kodit Zgjedhor. Si person i tretë në këtë proces është thirrur Partia Socialiste, ndërsa baza ligjore mbështetet edhe në jurisprudencën e mëparshme të Kolegjit (referuar rastit të Rrogozhinës 2023).

Ndryshime në trupin gjykues

Procesi ka nisur me një zhvillim procedural lidhur me përbërjen e trupit gjykues. Megjithëse shorti i parë i datës 13 maj caktoi gjyqtaren Alma Kodraliu si anëtare, një vendim i Këshillit të Lartë Gjyqësor (KLGj) detyroi rihedhjen e shortit.

Gjyqtarja Kodraliu, e cila ushtron funksionin në Gjykatën e Posaçme kundër Korrupsionit dhe Krimit të Organizuar (GJKKO), nuk mund ta ushtrojë më këtë funksion pranë Kolegjit Zgjedhor. Pas shortit të ri të hedhur mesditën e sotme, trupi gjykues përfundimtar do të përbëhet nga:

Lutfije Celami (Relatore)

Entela Shedula (Anëtare)

Rexhep Bekteshi (Anëtar)

Artan Çupi (Anëtar)

Enkel Peza (Anëtar – i sapozgjedhur nga shorti zëvendësues)

Kalendari gjyqësor

Gjykata Administrative e Apelit njoftoi se seanca gjyqësore është planifikuar të zhvillohet më datë 20 maj 2026, ora 14:30.

Ky proces konsiderohet vendimtar për administrimin e procesit zgjedhor në IEVP, pasi Vendimi nr. 6 i KQZ-së ngarkonte drejtpërdrejt Drejtorinë e Përgjithshme të Burgjeve dhe kryetarët e bashkive për zbatimin e tij. Kolegji do të duhet të vendosë nëse procedurat e hartimit të listave për të dënuarit dhe të paraburgosurit garantojnë integritetin e votës apo cenojnë standardet zgjedhore siç pretendon opozita.

/rtsh.al/