Deputeti i Partisë Demokratike për Qarkun e Gjirokastrës, Tritan Shehu, ka lëshuar akuza të forta në drejtim të qeverisë, duke e bërë atë drejtpërdrejt përgjegjëse për pasojat e rënda që lanë pas reshjet e dendura të 24 orëve të fundit në qytetin e gurtë.

Pas një inspektimi në terren, ku pa nga afër dëmet infrastrukturore në lagjet e sipërme të qytetit, Shehu e cilësoi situatën si një “krim të paralajmëruar”.

Amendamenti i rrëzuar për “emergjencat”

Në thelb të akuzës së deputetit demokrat qëndron refuzimi që mazhoranca i bëri propozimeve të opozitës gjatë miratimit të buxhetit të këtij viti. Shehu kujtoi se kishte propozuar një amendament specifik për krijimin e një Fondi Kontingjence për emergjencat civile, me një vlerë prej 20 milionë eurosh.

Sipas tij, ky fond ishte jetik për të parandaluar skenarë të tillë në zonat me risk të lartë si Gjirokastra, por qeveria zgjodhi ta privonte qarkun nga ky investim sigurie.

Teksa vëzhgonte rrugët e dëmtuara dhe rrëshqitjet e dherave, Shehu theksoi se natyra fatkeqësisht i dha të drejtë kërkesës së tij të refuzuar.

“Ngjarjet e djeshme e të sotme, ripërsëritja e përmbytjeve me dimensione e dëme përherë e më të mëdha, vërtetuan domosdoshmërinë e miratimit të atij amendamenti,” u shpreh Shehu. Ai shtoi se neglizhenca e qeverisë për të investuar në parandalim po u kushton shtrenjtë qytetarëve, të cilët tani përballen me prona të shkatërruara dhe infrastrukturë të degraduar.

/rtsh.al/