Presidenti i Federatës së Futbollit, Armand Duka, inauguroi tribunën e re moderne në stadiumin e Vorës, një investim i rëndësishëm i FSHF-së në bashkëpunim me Bashkinë Vorë, pak para nisjes së ndeshjes së kampionatit “Abissnet Superiore” mes Vorës dhe Vllaznisë.

Në ceremoninë e inaugurimit morën pjesë edhe Ministri i Turizmit, Kulturës dhe Sportit, Blendi Gonxhja, si dhe Kryetari i Bashkisë Vorë, Blerim Shera, të cilët vlerësuan këtë investim që i jep një tjetër standard infrastrukturës sportive në Vorë.

Para nisjes së ndeshjes, Presidenti Duka, ministri Gonxhja dhe kryetari Shera takuan lojtarët e dy skuadrave në fushën e lojës dhe zbuluan edhe pllakën e inaugurimit të tribunës së re.

Tribuna e re qendrore ofron kushte moderne për zhvillimin e ndeshjeve dhe për pritjen e tifozëve, duke përfshirë ambiente të rinovuara për ekipet, stafet teknike dhe median, sipas standardeve të UEFA-s.

Ky investim është pjesë e strategjisë së Federatës Shqiptare të Futbollit për zhvillimin e infrastrukturës sportive në të gjithë vendin, duke krijuar kushte më të mira për klubet, futbollistët dhe komunitetin, si dhe duke ndihmuar në rritjen e cilësisë së futbollit shqiptar.