Mesfushori turk qëndroi në stol gjatë gjithë derbit me Milanin. Për mbrojtësin duket se bëhet fjalë vetëm për një kontuzion të forte.

Ende me shijen e hidhur të humbjes në derbi, në praninë e presidentit Beppe Marotta, Interi iu rikthye fushës sot në Appiano. Stafi teknik ka qenë i interesuar për të mësuar më shumë në lidhje me gjendjen e lojtarëve me probleme fizike.

“Çalhanoglu nuk ishte mirë”, – tha trajneri Chivu pas derbit me Milanin, kur u pyet për mungesën e turkut. Lojtari ka kryer analizat, pasi ndjente dhimbje që nga seanca para ndeshjes me Milanin. Dhe ka rezultuar një problem në aduktorin e kofshës së djathtë, që do të thotë se e ka humbur edhe ndeshjen me Atalantën.

Ndryshe është situata me Alessandro Bastoni-n, i cili la fushën me dhimbje në derbi. Mbrojtësi u pa të çalonte, por mësohet se nuk ka as tërheqje dhe as frakturë. Problemi i tibias u shkaktua nga përplasja me Rabiot. Ka një kontuzion të fortë dhe pritet që dhimbja të zbutet, që më pas Bastoni të bëjë stërvitje normalisht. Shpresat e zikaltërve janë që ai të jetë në fushë kundër Dea-s, skuadrës së Berat Gjimshitit.