Sekretari i Përgjithshëm i Inxhinierëve Konsulentë Gëzim Beqaj i ftuar në RTSH24 ka deklaruar se është vetë ligji që e përcakton formimin e Urdhrit të Inxhinierëve.

Sipas Beqajt, ashtu si është urdhri i infermierëve apo farmacistëve ashtu përcaktohet nga ligji edhe për Urdhrin e Inxhinierëve.

“Ky ligj i vitit 2009 në nenin numër 5 shpjegon se cilat quhen profesione të rregulluara, stomatologët, infermierët, farmacistët, dhe në fund thotë inxhinieri. Pra, e thotë ligji! Jemi detyruar ta bëjmë sipas ligjit. Ligji prevalon mbi gjithçka”, është shprehur Beqaj.   

Beqaj vuri në dukje se duhet një ligj i veçantë për profesionin e inxhinierit, pasi nevojitet përgjegjësi.

Sipas Beqajt, firmat sot “hidhet firma kuturu dhe ai që përfiton shërbimin tonë është qytetari por duhet garantuar, se nuk është i sigurt sot”.

“Sistemi i licensimit është në moszbatim të ligjit, por të shkojmë në Gjykatë Kushtetuese rrëzohen të gjitha ato licenca që janë dhënë sot.

Ne themi që licenca e kufizon inxhinierin.

Licenca nuk do të ketë, por çdo anëtar i Urdhrit do të konkurrojë me dijen e tij, me shërbimin tënd në treg do konkurrosh me përgjegjësinë tënde në treg. Sot nuk ka përgjegjësi, firmos inxhinieri bie rruga, shembet shkolla, digjet banesa nga zjarri ku është përgjegjësia e inxhinierit.

Urdhri duhet për të mbrojtur inxhinierin por edhe të nxjerrë përgjegjësitë ”, theksoi Beqaj.

/rtsh.al/