Policia e Tiranës ka arrestuar 12 persona ndërsa 15 të tjerë i ka proceduar penalisht, për shkak se kanë cenuar perimetrin e sigurisë në shkolla si dhe kanë kundërshtuar efektivët e Policisë.

Sipas njoftimit të shpërndarë për mediat, blutë e kryeqytetit saktësuan se, më datë 14 shtator rreth orës 07:30, një grup personash u grumbulluan në sheshin “Skënderbe”, për tubim, pa lejen përkatëse, dhe vijuan marshimin drejt Rrugës së Durrësit, ku ndaluan pranë një gjimnazi duke u bërë thirrje nxënësve për bojkotimin e procesit mësimor dhe pjesëmarrje në tubimin.  Po sipas njoftimit, pavarësisht thirrjeve të punonjësve të Policisë për largimin nga perimetri i sigurisë në shkollë dhe për lirimin e trotuarit për kalimin e qytetarëve, disa prej nuk iu bindën urdhrave dhe kundërshtuan me forcë punonjësit e Policisë, gjatë shoqërimit.

12 personat e arrestuar janë: E. K, D. B, A. D, E. B , R. D, B. I, V. D, A. M, A. A , R. K, K. B dhe E. Xh.

Mbi ta rëndojnë disa vepra penale, si “Organizimi dhe pjesëmarrja në grumbullime e manifestime të paligjshme”, “Kundërshtimi i punonjësit të Policisë së rendit publik”, “Mosbindja ndaj urdhrit të punonjësit të Policisë”, “Prishja e qetësisë publike” dhe “Shtytja e të miturve në krim”.

/rtsh.al/