Në prag të ndeshjes kundër Le Havre, Luis Enrique përditësoi situatën e Ousmane Dembélé, i cili mbetet jashtë fushave për shkak të një dëmtimi në pulpën e majtë. PSG njoftoi më parë se anësori francez kishte ndjekur një program rikuperimi gjatë periudhës së ndeshjeve të përfaqësueses, por mbetet një pasiguri e madhe në lidhje me kohën e rikthimit të tij, veçanërisht duke pasur parasysh maratonën me tetë ndeshje që i pret parisienët deri në fund të dhjetorit.

Kur u pyet nga mediat për një datë të mundshme rikthimi, trajneri spanjoll mbeti jashtëzakonisht i kujdesshëm: “Nuk e di, nuk jam mjek. Ai po përmirësohet, ndoshta do të jetë në gjendje të bëjë disa ushtrime, por nuk mund t’ju jap asnjë siguri. Duhet të jemi më të kujdesshëm në këto raste. Do ta shohim se si do të ndihet në javët e ardhshme dhe do të vendosim se kur do të kthehet”.