Rreth 150 punonjës të firmës “Global Energy“,  nënkontraktore e Bankers Petroleum, kanë dalë paraditen e kësaj të marte në një protestë pranë zyrave të kompanisë në Fier. Ata thonë se kanë vonesë të pagave për shkak se Bankers nuk ka shlyer detyrimet ndaj Global Energy.

“Për shkak të informacioneve të fundit dhe çfarë thuhet në media dhe ne jemi shumë konfuzë, ne nuk kemi marrë pagat e muajit nëntor. puset janë ndalur… jo sot, jo nesër. kjo është hera e parë që ka vajtur në këtë situatë”, shprehen punonjësit.

Situata ka qenë problematike prej disa muajsh, por nëntori është muaji i parë që kompania nuk mundet të paguajë punonjësit. E megjithatë ajo çfarë i shqetëson më shumë, është vijimësia e kompanisë pas deklaratës zyrtare se dogana ka bllokuar infrastrukturën nxjerrëse të vendburimit të Patos- Marinzës.

“Pagat kemi që një muaj pa i marrë kemi lënë afat një javë dhe s’i kemi marrë. Të gjithë këtu janë me kredi, me borxhe”, shprehet punonjësi.

Sipas një deklarate të shpërndarë nga vetë Bankers të hënën në mbrëmje, bllokimi i veprimtarisë naftënxjerrëse të kësaj kompanie nga doganat ka ardhur si rrjedhojë e pretendimit të mospagesës së akcisëz së holluesit të naftës, rreth 3 miliardë lekë.

Gazetare: N. Spahiu

/rtsh.al/