Në Shërbimin e Kardiokirurgjisë të Qendrës Spitalore Universitare “Nënë Tereza” (QSUT) është realizuar për herë të parë një ndërhyrje miniinvazive për bajpas koronar, pa hapje të sternumit dhe pa ndaluar zemrën.

Pacienti 74-vjeçar iu nënshtrua operacionit përmes një miniincizioni prej vetëm 5 cm në hapësirën e pestë interkostale, duke shmangur teknikën klasike të hapjes së sternumit. 

Në një video të publikuar nga Ministria e Shëndetësisë dhe Mbrojtjes Sociale, Prof. asc. Altin Veshti deklaroi se kjo metodë inovative përfaqëson një hap të rëndësishëm drejt kirurgjisë moderne kardiake, pasi redukton traumën kirurgjikale, shmang transfuzionin e gjakut dhe mundëson rikuperim më të shpejtë.

 “Pacienti pritet t’i rikthehet jetës normale brenda pak ditësh,” theksoi ai. 

Pacienti ishte paraqitur fillimisht në urgjencën e QSUT me infarkt të ventrikulit të djathtë. Në fazën akute, ekipi mjekësor vendosi një stent në arterien koronare të djathtë, duke stabilizuar gjendjen.

Më pas, sipas protokollit, u programua ndërhyrja për bajpasin koronar me arterien mamaria LAD, arteria kryesore e zemrës. 

Kjo teknikë sjell përfitime të shumta për pacientët, më pak dhimbje pas operacionit, më pak komplikacione dhe kohë më të shkurtër rikuperimi.

Ky sukses konsiderohet një arritje e madhe për kardiokirurgjinë shqiptare dhe një hap përpara në aplikimin e teknikave bashkëkohore në sistemin shëndetësor publik. 

/rtsh.al/