Kryeministri Edi Rama i shoqëruar nga ministri i Ekonomisë, Kulturës dhe Inovacionit, Blendi Gonxhja, inspektuan Mozaikun e Tiranës, që fal investimit të bërë së fundmi është transformuar në një qendër të re atraksioni për publikun dhe vizitorët e huaj.

I shndërruar në një nga destinacionet turistike më të rëndësishme të kryeqytetit, ku përveç pjesës së muzealizimit të objekteve antike është konceptuar edhe si një qendër edukimi e inovacioni për fëmijët, Rama e cilësoi këtë një investim që i shërben edhe komunitetit.

“Mozaiku i Tiranës, ky thesar i vyer i arkeologjisë shqiptare, ka rilindur si një ndër destinacionet turistike më të rëndësishme të kryeqytetit, ku ruhen copëza të historisë sonë të antikitetit. Mozaiku përveç pjesës së muzealizimit të objekteve antike është konceptuar edhe si një qendër edukimi e inovacioni për fëmijët“, shkruan Rama.

Ky projekt unik do të sjellë më pranë qytetarëve dhe turistëve mozaikët e mbyllur të periudhës së antikitetit dhe antikitetit të vonë, të ruajtur në sitet tona më të rëndësishme.

/rtsh.al/