Rezerva Federale e Shteteve të Bashkuara uli për herë të parë këtë vit normën bazë të interesit, duke sinjalizuar shqetësim për ngadalësimin e punësimit dhe rreziqet në tregun e punës.

Vendimi erdhi mes një presioni të shtuar nga presidenti Donald Trump, i cili prej muajsh ka kërkuar ulje më të forta.

Normat u ulën me 25 pikë bazë, në intervalin 4.0 deri në 4.25 për qind, dhe priten edhe dy ulje të tjera brenda vitit.

Vetëm anëtari më i ri i bordit, Stephen Miran, ish-këshilltar i Trump, votoi kundër, duke kërkuar një ulje më të thellë. Miran mori pjesë për herë të parë në mbledhje, vetëm një ditë pasi u betua si guvernator i Fed-it.

Sipas Bankës Qendrore, ekonomia parashikohet të rritet me 1.6 për qind vitin e ardhshëm, ndërsa inflacioni dhe papunësia mbeten të pandryshuara. Federata thekson se rreziqet për tregun e punës janë shtuar, ndërkohë që inflacioni vazhdon të jetë mbi objektivin 2 për qind.

Tregu i punës po humbet ritmin dhe papunësia është rritur lehtë, ndonëse ende në nivele të ulëta. Trump ka kritikuar hapur kreun e Fed-it, Jerome Poëell, dhe është përpjekur të ndikojë në përbërjen e bordit drejtues.

Ndërkohë, Miran është kritikuar nga demokratët për mënyrën si kaloi nga Shtëpia e Bardhë në Fed, ndërsa mandati i tij zgjat deri në fund të janarit.

Ekonomistët paralajmërojnë se ndikimi politik ndaj bankave qendrore mund të sjellë pasoja negative për ekonominë.

Ulja e fundit e normave ishte në dhjetor dhe gjatë këtij viti ato janë mbajtur të pandryshuara për të vlerësuar ndikimin e tarifave tregtare të vendosura nga administrata Trump.

Gazetare: Artur Mata

/rtsh.al/