Rrëzohet kërkesa e Partisë Demokratike për interpelancë urgjente me Ministren e Infrastrukturës dhe Energjisë, Belinda Balluku, e marrë e pandehur nga Prokuroria e Posaçme për Tunelin e Llogarasë.

Nga ana e tij, kryeparlamentari Peleshi argumentoi se çështja është nën hetim nga SPAK dhe se ndërhyrja e Kuvendit do binte ndesh me parimet e pavarësisë së organit të akuzës. Ai theksoi se zhvillimi i interpelancës, është i pamundur për t’u realizuar.

“Kuvendi të ushtrojë funksionet kontrolluese pa ndërhyrë në veprimtarinë që janë objekt i procedurave gjyqësore apo hetimore në zhvillim.

Lidhur me objektin e kërkesës së paraqitur, ajo lidhet me një çështje aktualisht në hetim nga SPAK, në këto kushte ndërhyrja e kuvendit përmes zhvillimit të një interpelance që binte ndesh me parimet e  pavarësisë së organit të akuzës dhe ndalimin e çdo ndikimi në proceset hetimore të garantuar nga kushtetuta dhe ligji për prokurorinë.

Për këto arsye, vlerësoj se zhvillimi i interpelancës urgjente është i pamundur për t’u realizuar”, deklaroi Peleshi.

Kërkesa për interpelancë u parashtrua në Kuvend nga deputeti demokrat Klevis Balliu i cili kërkoi prezencën e ministres Balluku në seancë për t’iu dhënë përgjigje pyetjeve të opozitës.

Prokuroria e Posaçme kundër Korrupsionit dhe Krimit të Organizuar (SPAK) njoftoi zyrtarisht më 31 tetor 2025, ngritjen e akuzës penale ndaj Ministres në detyrë të Infrastrukturës dhe Energjisë, Belinda Balluku.

/rtsh.al/