Presidenti i SHBA-së, Donald Trump, ka deklaruar se një marrëveshje për t’i dhënë fund përplasjeve midis SHBA-së dhe Iranit pritet të nënshkruhet të dielën, ndërsa zyrtarët iranianë kanë treguar kujdes lidhur me afatin kohor të finalizimit.

Në një postim në rrjetet sociale, Trump tha se menjëherë pas nënshkrimit të marrëveshjes, Strait of Hormuz do të rihapet plotësisht për qarkullimin detar. Ai shtoi gjithashtu se SHBA-ja synon të marrë nën kontroll rezervat iraniane të uraniumit të pasuruar, të cilat i quajti “pluhur bërthamor”, për t’i shkatërruar më vonë.

Ndërkohë, zëdhënësi i Ministrisë së Jashtme të Iranit, Esmaeil Baghaei, tha se ende nuk është përcaktuar data e saktë e nënshkrimit të memorandumit të mirëkuptimit dhe se kjo nuk pritet të ndodhë menjëherë.

Edhe Shehbaz Sharif, kryeministri i Pakistanit, i cili ka luajtur rol ndërmjetësues në negociata, deklaroi se palët janë më pranë një marrëveshjeje paqeje se kurrë më parë. Sipas tij, nënshkrimi elektronik i dokumentit mund të realizohet brenda 24 orëve, ndërsa bisedimet teknike do të vazhdojnë javën e ardhshme.

Nga ana iraniane, ministri i Jashtëm Seyed Abbas Araghchi konfirmoi se një marrëveshje me SHBA-në është afër dhe tha se ajo do të përfshinte rihapjen e Ngushticës së Hormuzit dhe lehtësimin e kufizimeve ekonomike ndaj Iranit. Megjithatë, ai theksoi se negociatat për programin bërthamor iranian do të zhvillohen në një fazë të mëvonshme.

Konflikti aktual nisi pas sulmeve amerikane dhe izraelite ndaj objektivave në Iran më 28 shkurt, duke shkaktuar kundërpërgjigje iraniane kundër Izraelit dhe aleatëve të SHBA-së në Gjirin Persik.

/rtsh.al/