Ushtria amerikane ka kryer sulme ajrore të hënën (15 dhjetor) kundër tre anijeve të dyshuara për trafik droge në Oqeanin Paqësor Lindor, duke vrarë të paktën 8 persona.

“Më 15 dhjetor, me drejtimin e @SecWar Pete Hegseth, Task Forca e Përbashkët Southern Spear kreu sulme kinetike vdekjeprurëse ndaj tre anijeve të operuara nga Organizata të Caktuara Terroriste në ujërat ndërkombëtare. Inteligjenca konfirmoi se anijet po kalonin përgjatë rrugëve të njohura të trafikimit të drogës në Paqësorin Lindor dhe ishin të angazhuara në trafikim”, njoftoi Komanda Jugore e SHBA-së (SOUTHCOM).

Këto sulme janë pjesë e Operacionit “Shtiza Jugore”, një fushatë që administrata Trump ka thënë se synon të kufizojë trafikun e narkotikëve. Sipas autoriteteve, deri tani në kuadër të operacionit janë vrarë të paktën 95 persona, ndërsa sulmi më i fundit ndaj një anijeje të dyshuar më 4 dhjetor shkaktoi vdekjen e katër personave në bord.

Sulmet e fundit ngrejnë pyetje mbi ofensivën e SHBA-së ndaj karteleve të drogës. Administrata Trump i ka informuar Kongresin se Shtetet e Bashkuara ndodhen në një “konflikt të armatosur” me kartelet që filloi më 2 shtator. Sulmi pasues në Karaibe, pas sulmit fillestar që nuk vrau të gjithë personat në bord, ka nxitur shqetësime nga disa ligjvënës demokratë dhe ekspertë ligjorë, të cilët e konsiderojnë mundësisht si krim lufte.

Udhëheqësi i pakicës në Senat, Chuck Schumer, njoftoi se këtë të martë (16 dhjetor) do të mbahet një takim informues për senatorët mbi sulmet, ku do të marrin pjesë Sekretari i Shtetit Marco Rubio dhe Sekretari i Mbrojtjes Pete Hegseth. “Populli amerikan meriton mbikëqyrje. Ne synojmë ta ofrojmë atë”, shkroi Schumer në rrjetin X.

Rubio dhe Hegseth do të japin gjithashtu një informim të klasifikuar për ligjvënësit e Dhomës së Përfaqësuesve, sipas burimeve të njohura me planet.

/rtsh.al/