Moti i keq ka përfshirë të gjithë vendin, duke shkaktuar problematika në disa zona. Segmenti rrugor Ura e Shtrenjtë-Prekal është shembur, duke bërë  të pamundur lëvizjen e automjeteve. Elvis Deda, banor i zonës, në një lidhje për  emisionin “Në Kohë Reale” në RTSH, tha se situata është jashtëzakonisht e vështirë.

“Ka një shembje të bazamentit të rrugës. Për momentin ndërhyrja është e pamundur. Rruga është e pakalueshme për automjetet, por edhe për banorët për të lëvizur në këmbë është e rrezikshme. Situata është jashtëzakonisht e vështirë, duke pas parasysh edhe kushtet e banorëve”, u shpreh ai.

Në një reagim, Bashkia Shkodër bëri me dije se janë kryer monitorimet dhe se është hartuar edhe nj ëplan emergjent për riparimin e rrugës. Po ashtu, në zonën e Shoshit, ku janë evidentuar rrëshqitje dherash dhe shembje të trupit të rrugës, ekipet e bashkisë pritet të ndërhyjnë nesër, në varësi të kushteve atmosferike, për hapjen e segmentit të bllokuar.

“Në aksin Prekal – Ura e Shtrenjtë, inxhinierët e Bashkisë Shkodër kanë kryer monitorimin e situatës dhe kanë hartuar një plan emergjent për riparimin e rrugës gjatë kësaj jave. Në zonën e Shoshit, ku janë evidentuar rrëshqitje dherash dhe shembje të trupit të rrugës, ekipet e Bashkisë Shkodër, nesër por në varësi të kushteve atmosferike, do të ndërhyjnë për hapjen e segmentit të bllokuar. Bashkia Shkodër është pranë banorëve në këtë situatë, në gatishmëri për çdo emergjencë, dhe i këshillon qytetarët të shmangin lëvizjet në këto zona, për shkak të rrëshqitjeve të vazhdueshme, të cilat mund të rrezikojnë jetën e kalimtarëve”, thuhet në reagim.

/rtsh.al/