Kryedemokrati Sali Berisha ka komentuar vendimin e Këshillit të Ministrave për shkarkimin e Erion Veliajt nga detyra e kryetarit të Bashkisë së Tiranës.

Në një deklaratë për medie, ai u shpreh se Veliaj i është kërkuar në mënyrë ultimative që të mos i drejtohet Gjykatës Kushtetuese, pasi sikurse pretendon kryedemokrati, kjo rrugë do e shpëtonte atë nga burgu

“Çfarë po ndodh? Erion Veliajt po i kërkohet në mënyrë ultimative që të mos shkojë në Gjykatë Kushtetuese në mënyrë që të dalë nga burgu, të ndiqet i lirë dhe të ketë lehtësira.

Tani vijmë tek mbledhja? Cili është varianti. Varianti është antikushtetues. Çfarë ka ndërmend tu thotë Edi Rama sot shqiptarëve. Nuk e shkarkova unë, thotë. Noterizova vendimin. Por kurrë, kurrë fuqia ekzekutive nuk është noterizuese. Kurrë. Fuqia e ekzekutivit është fuqi ekzekutivi. Ndaj dhe quhet ekzekutiv”, deklaroi Berisha.

Kryedemokrati u shpreh më tej se opozita nuk do të zgjedhë rrugën e bojkotit parlamentar, edhe pse nuk njeh rezultatin e zgjedhjeve të 11 majit.

“Unë kam parashikimin tim, farsat janë farsa dhe nuk janë zgjedhje. Unë kësaj pyetje i dhashë përgjigje dje. Unë thashë që ne nuk bojkotojmë, se ka dy filozofi. Por thashë dhe e them, farsat janë farsa dhe nuk janë zgjedhje”, tha ai.