Shoferët e kamionëve boshnjakë bllokuan të hënën dy terminale mallrash në kufirin me Kroacinë, duke protestuar kundër rregullave të reja të vizave të Bashkimit Evropian, të cilat kufizojnë kohën e tyre të qëndrimit në bllok.

Që nga tetori, BE ka filluar zbatimin e Sistemit të Hyrjes/Daljes (EES), i cili i nënshtrohet të njëjtit rregull 90 ditë në 180 ditë si turistët.

Shoferët e Ballkanit e cilësojnë këtë sistem si “diskriminues”, pasi sipas tyre e bën të pamundur administrativisht punën e tyre.

Zbatimi pritet të hyjë plotësisht në fuqi më 10 prill, duke sjellë kontrolle më të rrepta dhe kthime të shumta mbrapsht në kufi.

“Puna jonë është bërë e pamundur administrativisht”, tha Hidajet Muratovic, një nga organizatorët e protestës në Orasje, duke shtuar se shoferët nuk do të dorëzohen pa një zgjidhje konkrete.

Të hënën, terminalet në Orasje dhe Svilaj u bllokuan nga kamionistët, ndërsa në Gradiska policia pengoi përpjekjen për bllokim. Protesta të ngjashme u mbajtën edhe në fund të janarit në Bosnjë, Serbi, Mal të Zi dhe Maqedoninë e Veriut, por u pezulluan pas njoftimit për bisedime në Bruksel, të cilat ende nuk kanë sjellë një vendim.

Shoferët serbë kanë vendosur të shtyjnë bllokadat e reja deri më 10 prill, kur rregullat e reja pritet të hyjnë plotësisht në fuqi.

/rtsh.al/