Policia në lindje të Republikës Demokratike të Kongos ka qëlluar në ajër për të shpërndarë turma të zemëruara që tentuan të marrin trupat e familjarëve të tyre të vdekur në një qendër trajtimi të Ebola-s në Mongwalu.

Sipas gazetarëve lokalë, trazirat nisën të dielën dhe vazhduan gjatë gjithë ditës. Turmat kërkonin dorëzimin e trupave të dy viktimave që kishin ndërruar jetë në qendrën e trajtimit brenda spitalit lokal.

Autoritetet shëndetësore paralajmërojnë se trupat e viktimave të Ebola-s janë shumë infektues dhe mund të përhapin më tej virusin gjatë ceremonive mortore tradicionale.

Drejtori mjekësor i Spitalit të Përgjithshëm të Mongwalut, Richard Lokudu, tha se spitali ishte vendosur në “gatishmëri të përgjithshme”.

Qendra e trajtimit ishte sulmuar edhe gjatë natës së të premtes, kur një tendë izolimi u dogj nga persona të irrituar.

Mosbesimi ndaj autoriteteve dhe skepticizmi mbi shkaqet e vdekjeve kanë krijuar tensione të forta në komunitetet e prekura nga Ebola. Ngjarje të ngjashme ndodhën edhe në qytetin Rwampara, ku turma dogjën tendat e izolimit pasi nuk u lejuan të merrnin trupin e një viktime për varrim.

Vullnetarët e Federatës Ndërkombëtare të Shoqatave të Kryqit të Kuq dhe Gjysmëhënës së Kuqe po kryejnë varrime të sigurta nën mbrojtjen e policisë për të shmangur përhapjen e virusit. Sipas organizatës, tre vullnetarë kanë humbur jetën pasi dyshohet se u infektuan gjatë trajtimit të trupave të viktimave.

Autoritetet shëndetësore raportojnë mbi 900 raste të dyshuara me Ebola dhe të paktën 220 viktima në shpërthimin aktual.

Ndërkohë, ministrat e Shëndetësisë nga RD Kongo, Uganda dhe Sudani i Jugut kanë finalizuar koordinimin ndërkufitar për përballimin e epidemisë, në bashkëpunim me Qendrat Afrikane për Kontrollin dhe Parandalimin e Sëmundjeve.

Uganda konfirmoi të hënën edhe dy raste të reja me Ebola, të dy punonjës shëndetësorë, duke e çuar numrin total të infektimeve në shtatë.

Drejtori i përgjithshëm i Africa CDC, Jean Kaseya, deklaroi se vendet afrikane po mobilizohen për të parandaluar përhapjen e mëtejshme të virusit dhe për të garantuar “varrime dinjitoze” për viktimat.

Ai bëri të ditur se RD Kongo, Uganda dhe Sudani i Jugut kanë rënë dakord për një buxhet prej 319 milionë dollarësh për të luftuar epideminë.

Shpërthimi aktual u shpall zyrtarisht më 15 maj në provincën Ituri dhe është epidemia e 17-të e Ebola-s në RD Kongo.

Organizata Botërore e Shëndetësisë e shpalli situatën emergjencë ndërkombëtare shëndetësore vetëm pak ditë më vonë.

Epidemia shkaktohet nga varianti i rrallë Bundibugyo i Ebola-s, për të cilin aktualisht nuk ekziston vaksinë apo trajtim specifik. Sipas OBSH-së, mund të duhen deri në nëntë muaj për zhvillimin e një vaksine efektive.