Seanca gjyqësore për dosjen “Partizani”, ku janë të akuzuar ish-kryeministri Sali Berisha dhe dhëndri i tij Jamarbër Malltezi, është shtyrë për më 5 maj 2025. Vendimi erdhi pasi mbrojtja kërkoi përjashtimin e gjyqtares Flojera Davidhi, duke e akuzuar për njëanshmëri në vendimmarrje.

Avokati Genc Gjokutaj deklaroi se kërkesa vjen pas vendimit të gjyqtares për pavlefshmërinë e kërkesave të mbrojtjes, pa sqaruar arsyet ligjore të refuzimit.

“Kemi depozituar me shkrim kërkesën për përjashtimin e gjyqtares. Vendimi i saj ishte i padrejtë dhe tregoi një qëndrim të njëanshëm. Sot ne depozituam në formë të shkruar kërkesën për përjashtimin e gjyqtares Flojera Davidhi dhe seanca u ndërpre sipas procedurës, sepse gjyqtarja nuk mund të japë vendim pa u shprehur një tjetër gjyqtar i gatshëm në lidhje me vendimmarrjen e saj,” tha ai për mediat.

Berisha ndodhet aktualisht në masën e sigurisë “detyrim paraqitje” për akuzën e korrupsionit pasiv, ndërsa Malltezi është në “arrest shtëpie” për korrupsion pasiv dhe pastrim parash. Çështja lidhet me hetimet për privatizimin e ish-klubit sportiv “Partizani”.

/rtsh.al/