Një ushtar i Forcave Speciale të Shteteve të Bashkuara, i cili ishte pjesë e operacionit për kapjen e Presidentit të Venezuelës, Nicolás Maduro, është arrestuar nën akuzat për përdorimin e informacioneve të klasifikuara për të vënë baste në internet. Përmes kësaj skeme, ai dyshohet se ka fituar rreth 400,000 dollarë.

Sipas një aktakuze të bërë publike së fundmi, Kapiten Rreshteri Gannon Ken Van Dyke hapi një llogari në Polymarket — një nga tregjet më të mëdha të parashikimeve në internet — në fund të muajit dhjetor. Duke pasur qasje të privilegjuar në planifikimin e “Operacionit Absolute Resolve”, ai vuri rreth 32,000 dollarë baste se Maduro do të “largohej” nga pushteti deri në muajin janar.

Përdorimi i informacionit të klasifikuar dhe përpjekja për fshehje

Prokurorët federalë pretendojnë se Van Dyke, një ushtar aktiv i stacionuar në Fort Bragg, bëri 13 baste të pakontrollueshme nga 27 dhjetori deri më 2 janar, me bastin e fundit të vendosur vetëm pak orë para nisjes së operacionit të fshehtë që ekstradoi Maduron nga Karakasi.

Pasi fitoi mbi 400,000 dollarë, ushtari dyshohet se i dërgoi paratë në një kasafortë kriptomonedhash të huaja, përpara se t’i kalonte ato në një llogari brokerimi online, në një përpjekje për të fshehur origjinën e tyre. Përveç akuzave penale për vjedhje, mashtrim dhe keqpërdorim të informacionit qeveritar, kundër tij është ngritur edhe një padi civile nga Komisioni i Tregtimit të Kontratave të Ardhshme të Mallrave.

“Atyre të cilëve u është besuar të ruajnë sekretet e kombit tonë kanë detyrën t’i mbrojnë ato dhe jo t’i përdorin ato informacione për përfitime personale financiare,” deklaroi Jay Clayton, prokurori i SHBA-së për Distriktin Jugor të Nju Jorkut.

Platforma Polymarket konfirmoi bashkëpunimin me autoritetet, duke theksuar se sapo identifikuan një përdorues që tregtonte bazuar në informacione të klasifikuara, çështja iu referua Departamentit të Drejtësisë. “Tregtia e brendshme nuk ka vend në Polymarket. Arrestimi i sotëm është provë se sistemi funksionon,” deklaroi kompania.

Reagimet politike dhe rreziku i “tregjeve të parashikimeve”

Arrestimi i Van Dyke ka ngjallur debate të forta në Uashington lidhur me rregullimin e tregjeve të parashikimeve (prediction markets), ku përdoruesit shpenzojnë miliarda dollarë çdo javë duke vënë baste mbi ngjarje gjeopolitike. Ligjvënësit në Kongres tashmë po shqyrtojnë projektligje për të ashpërsuar dënimet kundër zyrtarëve qeveritarë që abuzojnë me informacionin e brendshëm.

Lidhur me këtë skandal ka reaguar edhe Presidenti Donald Trump, i cili shprehu shqetësimin e tij për rritjen e basteve mbi ngjarjet globale, duke e krahasuar veprimin e ushtarit me skandalet sportive.

“Kjo është si të vërë bast Pete Rose për ekipin e tij,” u tha Trump gazetarëve, duke iu referuar legjendës së bejsbollit që u përjashtua nga sporti për shkak të bixhozit. “E gjithë bota, për fat të keq, është bërë si një kazino. Unë nuk jam i kënaqur me këtë.”

Pas përfundimit të operacionit ushtarak që hasi në rezistencë të ashpër zjarri, Nicolás Maduro u transportua në Nju Jork për t’u përballur me akuzat federale në lidhje me trafikun ndërkombëtar të drogës, akuza për të cilat ai është deklaruar i pafajshëm. Ndërkohë, Rreshteri Van Dyke pritet të dalë së shpejti para gjykatës në Karolinën e Veriut për t’u përballur me drejtësinë ushtarake dhe atë federale.

/rtsh.al/