Policia greke ka vënë në pranga dy vëllezër me origjinë shqiptare, të akuzuar si autorë të një sulmi me tritol në një diskotekë në Athinë, ngjarje kjo e ndodhur në 7 tetor të 2025-ës. Të arrestuarit janë të moshave 40 dhe 32 vjeç.

Sipas autoriteteve, vëllai më i madh rezulton me precedentë të shumtë penalë, përfshirë sjellje të pahijshme, grabitje, plagosje të rënda trupore, falsifikim dhe shkelje të ligjeve për armët. Ndërsa 32-vjeçari akuzohet për vjedhje, mashtrim, kërcënime, fyerje, si dhe shkelje të Kodit Antidoping dhe atij të narkotikëve.

Arrestimi i dy vëllezërve u krye pas një operacioni të koordinuar nga oficerët e Prokurorisë së Zhvatjeve, ditën e djeshme (22 janar).

Me ndihmën e Grupit të Operacioneve Speciale të Ministrisë së Brendshme dhe në prani të një prokurori, forcat e policisë ndërhynë me forcë në banesën ku jetonin, duke arrestuar njërin prej tyre. Vëllai tjetër u gjet i fshehur në një zonë të hapur përreth banesës dhe, sipas policisë, ka kundërshtuar arrestimin duke ushtruar dhunë ndaj efektivëve, por u neutralizua.

Sipas informacioneve zyrtare, dy të dyshuarit kanë pranuar autorësinë e aktit. Njëri prej tyre ka deklaruar se ishte paguar për vendosjen e bombës, por ka refuzuar të zbulojë personin që e porositi, duke pretenduar se kishte frikë për jetën e tij.

Ai ka treguar se bombën e vendosi në një dyqan pranë zonës së “Hilton”, ku kishte shkuar bashkë me vëllanë e tij, duke përdorur automjetin e një gruaje, e cila gjithashtu është arrestuar. Pajisja shpërthyese ishte transportuar në një çantë dhe u aktivizua në distancë pasi u largua nga vendngjarja.

Gruaja e arrestuar akuzohet për bashkëpunim të thjeshtë në shpërthim, prodhim dhe posedim të materialeve shpërthyese dhe ndezëse, dëmtim prone, si dhe shkelje të legjislacionit për armët.

/rtsh.al/