Të martën pritet shkarkimi i kryetarit të Bashkisë së Tiranës Erjon Veliajt. 

Këshilli Bashkiak do të mblidhet në një seancë të jashtëzakonshme, pasi grupi i këshilltarëve socialistë kërkoi shkarkimin e Erion Veliajt nga pozicioni i kryetarit të Bashkisë së Tiranës.

Kjo për faktin se nga data 10 shkurt 2025, kryeqyteti nuk ka kryetarin e saj të zgjedhur, i cili ndodhet në masën e arrestit. Këshilltarët i referohen në kërkesë nenit 62 të ligjit për pushtetin vendor, i cili sanksionon nisjen e procedurave për shkarkim në rast se kryebashkiaku nuk paraqitet në detyrë për një periudhë 3-mujore të pandërprerë.

Më herët edhe këshilltarët e opozitës në Bashkinë e Tiranës kanë kërkuar shkarkimin e Veliajt. 

Para seancës së jashtëzakonshme të Këshillit Bashkiak në orën 16:00, të martën do të mblidhet Komisioni i Ligjeve të Bashkisë, i cili do të legjitimojë procesin. Kjo mbledhje ishte e parashikuar të mbahej sot (22 shtator), por ajo është shtyrë për ditën e nesërme në orën 10:00. 

Ndërkohë që Këshilli Bashkiak i Tiranës i është përgjigjur zyrtarisht kryetarit të Bashkisë, Erion Veliajt, në lidhje me kërkesën e tij për të marrë pjesë në mbledhjen e 23 shtatorit. Shkresa që mban firmën e Sekretarit të Këshillit Bashkiak i bën me dije Erjon Veliajt se në rast pamundësie për të qenë prezent, qëndrimet e tij mund t’i paraqesë me shkrim.

Ndërkohë, Partia Socialiste ka shpallur kandidaturën e Ogerta Manastirliut për zgjedhjet e pjesshme të Tiranës, që pritet të mbahen pas shkarkimit të Veliajt.

/rtsh.al/