Një plagosje me armë zjarri është regjistruar sot në lagjen “Zef Hoti” në Mamurras, pas një konflikti të çastit. Bëhet me dije se i plagosur ka mbetur personi me inicialet P.M., i cili ka marrë një plumb në dorë. I plagosuri është transportuar menjëherë drejt Spitalit të Traumës në Tiranë për të marrë ndihmën e nevojshme mjekësore.

Sipas burimeve, i plagosuri sapo ishte kthyer nga Anglia dhe kishte pasur një konflikt të çastit me autorin, i cili tashmë është identifikuar nga policia dhe po kryhen kontrolle për kapjen e tij. Sipas të dhënave, i plagosuri i kishte kërkuar autorit të lëvizte me kujdes dhe të mos xhironte gomat e makinës para portës së shtëpisë së tij.

Por i riu është përgjigjur me të shtëna, duke qëlluar dy herë me pistoletë, ku njëri nga plumbat e ka kapur në krah Pjetër Markun. Ai po merr mjekim në Spitalin e Traumës në Tiranë dhe ndodhet jashtë rrezikut për jetën.

Grupi hetimor po punon për sqarimin e plotë të rrethanave dhe identifikimin e autorit të ngjarjes.

“Rreth orës 16:25, është paraqitur në spital për ndihmë mjekësore shtetasi P. M., 50 vjeç, banues në Mamurras, Kurbin, i cili dyshohet se është plagosur me armë zjarri në dorë, në rrethana ende të paqarta. 50-vjeçari ndodhet jashtë rrezikut për jetën. Menjëherë është ngritur grupi hetimor dhe, nën drejtimin e Prokurorisë, vijojnë hetimet për zbardhjen e rrethanave dhe dokumentimin ligjor të rastit”, thuhet në njoftimin e policisë.

/rtsh.al/