Presidenti amerikan Donald Trump ka deklaruar në një intervistë për “Bloomberg” se armëpushimi dyjavor me Iranin skadon të mërkurën në mbrëmje, sipas orës së Uashingtonit.

Trump e shpalli armëpushimin më 7 prill 2026, që do të thotë se afati real i skadimit është të martën në mbrëmje. Kështu, ai duket se ka shtuar një ditë në afatin aktual.

Kjo është deklarata e fundit në një seri deklaratash nga Trump në ditët e fundit.

Të dielën ai tha se zëvendëspresidenti JD Vance nuk do të merrte pjesë në raundin e dytë të bisedimeve me Iranin në Pakistan për arsye sigurie, por Shtëpia e Bardhë më vonë sqaroi se Vance në fakt do të udhëheqë delegacionin amerikan.

Sot më herët, Trump pretendoi se Vance ishte nisur tashmë për në Islamabad, ndërsa ai ende ndodhej në Uashington dhe nuk ishte larguar.

Në një intervistë tjetër, Trump tha se një marrëveshje me Iranin do të arrihej sot, edhe pse bisedimet nuk janë planifikuar të fillojnë para së martës dhe Teherani nuk ka konfirmuar as pjesëmarrjen e tij.

Në intervistën me Bloomberg, Trump tha se është shumë e pamundur që ai të pranojë zgjatjen e armëpushimit dyjavor, pasi SHBA synojnë të arrijnë një marrëveshje gjithëpërfshirëse me Iranin para se ai të skadojë.

Megjithatë, duke marrë parasysh numrin e madh të çështjeve që duhen diskutuar, nuk është e qartë nëse ka kohë të mjaftueshme për të arritur një marrëveshje të përhershme në një kohë kaq të shkurtër.

/rtsh.al/