Në kuadër të ligjit ‘‘për të drejtën e informimit‘‘ zyra e komisionarit urdhëron autoritetet publike dhe njësitë e vetëqeverisjes vendore për me shumë llogaridhënie. Drejtoresha e të Drejtës për Informim, Elona Hoxhaj sqaron se miratimi i dy programeve model të Transparencës parashikon përfshirjen e një fushe të re të dedikuar për veprimtarinë e Këshillave Bashkiak.

“Është ndërhyrë me programin model të transparencës proaktive të njësive të vetëqeverisjes vendore dhe njëkohësisht të programit model të dedikuar për të gjitha autoritet publike. Për sa i përket ndryshimit në programin model konsiston në shtimin e rubrike që lidhet me veprimtarinë e Këshillave Bashkiak si një prej organeve më të rëndësishme vendimmarrëse të pushtetit lokal”, u shpreh ajo.

Ky hap i monitorimit përmes mekanizmave kryesorë ecën nën vazhdën e zbatimit të detyrimeve që kërkon integrimi evropian.

“Tashmë të gjitha autoritet publike kanë detyrimin që të hedhin çdo lloj informacion, dokumentacioni që qytetarët të marrin këtë informacion”, tha Hoxhaj.                         

Miratimi i këtyre programeve synon të rrisë përdorimin e informacionit publik dhe shndërrimin e transparencës në një instrument efektiv në shërbim të qytetarëve, medias dhe institucioneve publike.

Gazetare: E. Hasanbelli 

/rtsh.al/