Sadleva Bodo është emëruar në krye të Drejtorisë së Burgjeve pas lirimit nga detyra të Adriatik Kupi. Vendimi është marrë ditën e djehsme në mbledhjen e Këshillit të Ministrave. Adriatik Kupi njoftoi dy ditë më parë dorëheqjen nga detyra pas shtatë muajsh në drejtimin e këtij institucioni.

“Agjencia për Media dhe Informim ju bën me dije vendimet e miratuara në mbledhjen e sotme të qeverisë datën 14.10.2026:

Këshilli i Ministrave vendosi miratimin e vendimeve:

-Për lirimin dhe emërimin në detyrë të drejtorit të Përgjithshëm të Burgjeve.

Adriatik Kupi, drejtor i Përgjithshëm i Burgjeve, lirohet nga kjo detyrë.

Znj. Sadleva Bodo emërohet drejtor i Përgjithshëm i Burgjeve”, thuhet në njoftim.

Sadleva Bodo ka ndërtuar një karrierë të gjatë në administratën publike, duke mbajtur disa pozicione të rëndësishme në Ministrinë e Brendshme dhe më pas në Byronë Kombëtare të Hetimit (BKH).

Përpara se të kalonte në BKH, Bodo ka shërbyer si këshilltare ligjore e drejtorit të Byrosë Kombëtare të Hetimit, ndërsa më herët ka ushtruar detyrën e drejtoreshës së Drejtorisë së Integrimit Europian, Koordinimit, Marrëveshjeve Ndërkombëtare dhe Asistencës në Ministrinë e Brendshme.

/rtsh.al/