I ndodhur në një vizitë zyrtare në Hungari, Ministri i Mbrojtjes Pirro Vengu zhvilloi një takim me përfaqësues të komunitetit shqiptar nga Shqipëria dhe Kosova që jetojnë e punojnë në këtë vend. Takimi u mbajt në ambientet e Ambasadës së Republikës së Shqipërisë në Budapest, ku ministri u njoh nga afër me sipërmarrës, mjekë, studentë, punëtorë dhe familjarë.

Vengu vlerësoi rolin e komunitetit shqiptar në Hungari, duke e cilësuar si një përfaqësues dinjitoz të vlerave kombëtare dhe një faktor të rëndësishëm në forcimin e marrëdhënieve mes dy vendeve.

“Një komunitet që na përfaqëson me dinjitet dhe që është pa dyshim një nga faktorët kontribues në sinergjinë mes Shqipërisë dhe Hungarisë,” – u shpreh ministri.

Ai shprehu mirënjohje për ambasadorin e Shqipërisë në Hungari, Ilirian Kuka, për ftesën dhe mundësinë për t’u takuar me përfaqësues të komunitetit shqiptar.

“Mirënjohje për ftesën e ambasadorit Ilirian Kuka dhe mundësinë për t’u njohur e bashkëbiseduar me disa prej tyre në ambientet e Ambasadës sonë në Budapest,” – theksoi Vengu.

Në përfundim, ministri falënderoi të pranishmit për mikpritjen dhe i inkurajoi ata të vijojnë të promovojnë vlerat shqiptare përmes punës dhe përkushtimit të tyre.

“Faleminderit për mikpritjen dhe ju uroj shumë sukses – vazhdoni të tregoni vlerat shqiptare përmes punës dhe përkushtimit tuaj,” – përfundoi ai.

/rtsh.al/