Një zjarr i fuqishëm ka përfshirë zonën pranë Los Gallardos, në provincën Almería të Spanjës, duke shkaktuar viktima dhe dëme të konsiderueshme materiale. Deri tani janë konfirmuar 12 viktima, ndërsa 23 persona rezultojnë të zhdukur. Shumë prej tyre u bllokuan në përpjekje për të shpëtuar nga fshati Bédar.

Rreth 600 banorë janë evakuuar dhe strehuar në qendra emergjente. Dëshmitarët e mbijetuar e përshkruajnë zjarrin si “frikësues dhe të pabesueshëm në shpejtësi”, ndërsa retë e tymit kanë mbuluar qiellin dhe duken si “shpërthimi bombe”.

Mbi 30 avionë dhe helikopterë po përdoren për të shuar flakët, ndërsa qindra zjarrfikës dhe ushtarë janë angazhuar në terren. Kryeministri Pedro Sánchez ka deklaruar se janë vënë në dispozicion të gjitha burimet kombëtare për të përballuar situatën. Megjithatë, autoritetet paralajmërojnë se ndryshimi i erërave mund ta komplikojë kontrollin e zjarrit, edhe pse aktualisht ai është “më së shumti nën kontroll”.

Zjarri u përhap me shpejtësi për shkak të bimësisë së thatë në zonë dhe erërave të forta, pas javësh me temperatura ekstreme. Spanja ka përjetuar disa valë të nxehtësisë rekord, të cilat kanë shkaktuar mbi 1,000 vdekje të tepërta vetëm në muajin qershor.

Fillimisht u raportua se zjarri mund të ishte shkaktuar nga një shtyllë elektrike e rrëzuar, por kompanitë e energjisë e kanë mohuar këtë, duke thënë se kablli ishte i çaktivizuar prej dekadash. Hetimet janë ende në zhvillim.

Ekspertët theksojnë se ndryshimet klimatike po intensifikojnë valët e të nxehtit dhe zjarret në Evropë, e cila po ngrohet dy herë më shpejt se mesatarja globale.

/rtsh.al/