Më shumë se 300,000 banorë janë detyruar të evakuohen nga shtëpitë e tyre në Francë dhe Spanjë, pasi zjarret masive vazhdojnë të përshkojnë sipërfaqe të tëra pyjore dhe bujqësore. Pas një vere me valë të nxehti ekstrem ku temperaturat tejkaluan 40 gradë Celsius, autoritetet raportojnë për situatën më të rëndë të dy dekadave të fundit.

Në rajonin e Madridit, autoritetet vlerësojnë se tri vatrat kryesore mbeten aktive në malet jashtë kryeqytetit, duke djegur një sipërfaqe prej rreth 770 km katror.

“Ky është padyshim zjarri më i madh në historinë e rajonit të Madridit,” deklaroi Francisco Martin, delegat i qeverisë spanjolle në Madrid, duke konfirmuar përmasat e paprecedentë të katastrofës.

Situata kritike në Francë, flakët drejt Bordeaux

Në Francë, zona më e goditur mbetet departamenti i Gironde, përreth qytetit të Bordeaux, ku janë evakuuar mbi 200,000 banorë. Brenda më pak se katër ditëve, flakët kanë shkatërruar më shumë se 420 km katror pyje dhe fusha — një sipërfaqe që i korrespondon katërfishit të madhësisë së Parisit.

Përparimi i shpejtë i zjarrit, i cili ndodhet vetëm 15 km larg jugut të Bordeaux, ka vënë në rrezik edhe objekte të ndjeshme ushtarake e industriale. Mes tyre përfshihen zona të përpunimit të kimikateve të rrezikshme dhe infrastruktura që punojnë me motorë raketash e raketa balistike franceze.

Imazhet satelitore mbi rajon tregojnë zona të tëra të nxiruara, ndërsa tymi dendur po përhapet me shpejtësi drejt lindjes.

Stuhitë e zjarrit, kur vatrat krijojnë motin e tyre

Përhapja me shpejtësi e flakëve ka krijuar një fenomen të rrallë e të rrezikshëm meteorologjik: stuhinë e zjarrit.

Nxehtësia extreme bën që ajri me tym, hi dhe avuj ujsh të ngrihet me shpejtësi drejt atmosferës. Ndërsa ftohet në lartësi, formohen re të llojit cumulonimbus (të ngjashme me ato të stuhive tropikale). Këto re mund të prodhojnë rrufe, të cilat nga ana e tyre ndezin vatra të reja zjarri kilometra larg vatrës kryesore, duke e bërë situatën të paparashikueshme për ekipet e emergjencës.

Ndërhyrja nga ajri dhe toka, mobilizohen mijëra forca

Për përballimin e emergjencës në Gironde janë angazhuar rreth 2,500 zjarrfikës, 1,500 pjesëtarë të forcave të armatosura dhe 1,200 oficerë policie e xhandarmërie.

• Nga ajri: Po përdoren avionë të posaçëm si Canadair, të cilët furnizohen me 6,000 litra ujë në vetëm 12 sekonda nga liqenet ose deti, si dhe mjete ajrore me lëndë izoluese (retardant). Avionët fluturojnë në mënyrë të vazhdueshme për të krijuar breza mbrojtës nga ajri.
• Nga toka: Ekipet po përdorin mjete të rënda si buldozerë dhe gërmues. Në afërsi të qytetit të Lacanau po ndërtohet një “brez i shuar zjarri” me gjerësi deri në 100 metra, duke zhveshur tokën nga bimësia për të ndërprerë lëndën djegëse për flakët.

Rreziqet mbeten të larta për ditët në vijim. Meteorologët parashikojnë ruajtjen e trysnisë së lartë atmosferike, çka do të sjellë temperatura edhe më të larta e mot të lehtë të thatë, duke vështirësuar përpjekjet e zjarrfikësve në të dyja vendet.

/rtsh.al/