Kylian Mbappé më në fund ka gjetur sërish buzëqeshjen e tij dhe është gjithnjë e më në qendër të Real Madridit të Carlo Ancelottit. Pas një fillimi të sezonit në të cilin shpeshherë gjendej në syrin e stuhisë edhe për shkak të situatave “ekstra”, sulmuesi francez i është rikthyer të qenit vendimtar dhe efikas.

26-vjeçari francez ishte gjithashtu vendimtar të premten në fitoren ndaj Valencias(1-2) dhe u zgjodh lojtari më i mirë i muajit dhjetor, muaji në të cilin shënoi pesë gola dhe u shpall kampion bote për klube pasi fitoi finale kundër Pachuca.

Pas marrjes së çmimit, ai shprehu mirënjohjen e tij: “Faleminderit shumë tifozëve për votën, është e rëndësishme. Dhjetori ishte një muaj i bukur për mua dhe për ekipin, sepse fituam një titull, shumë ndeshje në ligë dhe një ndeshje të rëndësishme të Champions League”.

“Jemi në një moment të mirë. Vitin e nisëm shumë mirë, me një ndeshje të vështirë që e fituam në fund dhe tani synojmë gjithçka. Shpresojmë të fitojmë dhe të luajmë mirë. Ka shumë ndeshje, por siç thonë këtu, ne duhet të fitojmë gjithçka”.