Niveli i ujit në liqenin e Fierzës ka pësuar një rritje të ndjeshme gjatë ditëve të fundit, si rezultat i shtimit të prurjeve nga lumenjtë furnizues, prurjeve anësore dhe shkrirjes së dëborës.

Reshjet e dendura kanë ndikuar pozitivisht në pasurimin e rezervave ujore të basenit më të madh ujëmbledhës në vend, duke e çuar nivelin e ujit në 274 metra mbi nivelin e detit.

Pavarësisht kësaj rritjeje, hidrocentrali i Fierzës vijon të punojë me kapacitet të reduktuar.

Kjo strategji menaxheriale synon të sigurojë një rezervë të mjaftueshme ujore për të garantuar prodhimin e energjisë në periudhat e ardhshme.

Rritja e nivelit të ujit është një sinjal pozitiv për sektorin energjetik, duke qenë se Fierza mbetet një burim kyç për prodhimin e energjisë elektrike në vend.

Historikisht, liqeni i Fierzës ka përjetuar luhatje të ndjeshme të nivelit të ujit, të ndikuara nga kushtet klimatike dhe menaxhimi i prurjeve.

Gjatë periudhave me reshje të pakta, niveli i ujit ka rënë ndjeshëm, duke kufizuar prodhimin e energjisë elektrike dhe duke krijuar shqetësime për furnizimin me ujë.

Në të kundërt, prurjet e shumta, siç është rasti aktual, ndihmojnë në stabilizimin e rezervave ujore dhe në përmirësimin e kapaciteteve hidroenergjetike të vendit.

Megjithatë, luhatjet e shpeshta të nivelit të ujit sjellin një tjetër shqetësim të rëndësishëm: ndotjen e liqenit.

Çdo herë që niveli i ujit rritet apo ulet ndjeshëm, në brigjet dhe shtratin e liqenit ekspozohen mbetje të ndryshme urbane e industriale, të cilat shpesh përhapen në sipërfaqe nga erërat ose transportohen nga prurjet anësore.

Gazetare: I. Bajraktari

/rtsh.al/