Zëvendëspresidenti amerikan JD Vance u takua në Vatikan me zyrtarë të lartë të Kishës Katolike. 

Vance, i cili u përplas me Papa Françeskun për politikën e emigracionit të presidentit amerikan Donald Trump, u takua me kardinalin Pietro Parolin, Sekretarin e Shtetit të Vatikanit dhe zëvendësin e tij.

Sipas një deklarate të publikuar pas takimit nga Selia e Shenjtë, ata zhvilluan bisedime dhe shkëmbyen mendime mbi situatën ndërkombëtare.

“Vance dhe kardinali Parolin diskutuan kryesisht në lidhje me vendet e prekura nga lufta, tensionet politike dhe situatat e vështira humanitare, me vëmendje të veçantë tek emigrantët, refugjatët dhe të burgosurit,” thuhet në deklaratën e Vatikanit.

Papa Françesku, i cili ka kufizuar daljet e tij publike me urdhër të mjekëve, ndërsa po shërohet nga pneumonia e dyfishtë, nuk mori pjesë në takim.

Zv.presidenti Vance ndodhet në Itali që nga e premtja, ku po merr pjesë edhe në festimet e Pashkës.

Gjatë qëndrimit në Romë, ai së bashku me familjen e tij mori pjesë në Liturgjinë e së Premtes së Madhe në Bazilikën e Shën Pjetrit.

Papa dhe zyrtarë të tjerë të Vatikanit kanë kritikuar disa politika të administratës Trump, duke përfshirë planet e presidentit amerikan për të dëbuar miliona emigrantë nga SHBA, por edhe ndërprerjen e programeve të ndihmës së huaj amerikane. 

Gazetare: Vjollca Zharri

/rtsh.al/