Autoritetet në Kashmirin e administruar nga India kanë urdhëruar evakuimin e qytetarëve nga zonat që i konsiderojnë të rrezikshme, ndërsa konflikti midis Nju-Delhit dhe Islamabadit përshkallëzohet.

Zëvendësguvernatori i Jammu dhe Kashmirit, Manoj Sinha, u ka dhënë udhëzime distrikteve që të zhvendosin njerëzit nga “zonat e cenueshme në vende më të sigurta”.

“Akomodimi, ushqimi dhe ilaçet do të sigurohen për qytetarët e evakuuar”, tha zyra e Zëvendësguvernatorit në X.

Urdhrat vijnë disa orë pasi India nisi një seri sulmesh ndaj asaj që e quajti “infrastrukturë terroriste” në Pakistan dhe Kashmirin e administruar nga Pakistani, duke i shtyrë fqinjët rivalë në prag të një lufte të plotë.

Pakistani njoftoi se të paktën 26 persona humbën jetën si pasojë e sulmeve të Indisë, mes të cilëve edhe fëmijë, ndërsa u plagosën 46 të tjerë. Pakistani tha gjithashtu se rrëzoi pesë avionë luftarakë indianë dhe një dron.

Nga ana e saj ushtria indiane pretendon se 7 civilë u vranë gjatë bombardimit me granata të trupave pakistaneze nga përtej kufirit.

Reagimet globale

Presidenti Donald Trump e quajti operacionin ushtarak të Indisë kundër Pakistanit “një turp”. Sekretari i Shtetit i SHBA-së, Marco Rubio, foli me këshilltarët e sigurisë kombëtare nga India dhe Pakistani dhe u bëri thirrje të dyja palëve që të mbajnë linjat e komunikimit të hapura dhe të shmangin përshkallëzimin e konfliktit.

Edhe sekretari i Përgjithshëm i OKB-së, António Guterres, ka shprehur shqetësim të thellë për operacionet ushtarake indiane përgjatë Vijës së Kontrollit dhe kufirit ndërkombëtar me Pakistanin.

Në të njëjtën linjë kanë qenë edhe deklaratat e Emirateve të Bashkuara të cilat i kanë kërkuar Indisë dhe Pakistanit të ushtrojnë përmbajtje, të ulin tensionet dhe të shmangin përshkallëzimin e mëtejshëm që mund të kërcënojë paqen rajonale dhe ndërkombëtare.

Sekretari kryesor i kabinetit japonez, Yoshimasa Hayashi tha se vendi i tij ishte “thellësisht e shqetësuar se ky incident mund të nxisë hakmarrje dhe të përshkallëzohet në një konflikt ushtarak në shkallë të plotë” dhe i bëri thirrje si Indisë ashtu edhe Pakistanit “të ushtrojnë përmbajtje dhe të stabilizojnë situatën përmes dialogut”.

Keqardhje për sulmet ushtarake të Indisë ka shprehur edhe Kina. “India dhe Pakistani janë fqinjë që nuk mund të zhvendosen dhe të dy janë gjithashtu fqinjë të Kinës”, tha një zëdhënës i Ministrisë së Jashtme të Kinës.

Ndërsa konflikti midis Pakistanit dhe Indisë përshkallëzohet, Kina është gjendur në një situatë të vështirë diplomatike.

Për javë të tëra, Pekini ka qenë duke vëzhguar nga afër përgjigjet e përbetuara midis “mikut të tij të hekurt” prej kohësh, Islamabadit, dhe Nju-Delhit, një rival rajonal me të cilin ka një mosmarrëveshje kufitare prej kohësh.

Kjo përshkallëzim i tensioneve vjen në një kohë kur Kina është përpjekur të përmirësojë marrëdhëniet me Indinë, si pjesë e një shtytjeje më të gjerë diplomatike për të forcuar lidhjet me fqinjët dhe partnerët tregtarë, për t’iu kundërvënë presionit nga administrata Trump.

Ndërkohë, Pakistani është një nga partnerët më të ngushtë të Kinës dhe një mbështetës kyç i Iniciativës së saj “Një Brez, një Rrugë”. Kina është furnizuesi kryesor i armëve të Pakistanit, me armët kineze që përbëjnë 81 përqind të importeve të armëve të Pakistanit në pesë vitet e fundit, sipas të dhënave nga grupi i ekspertëve suedez Instituti Ndërkombëtar i Stokholmit për Kërkime mbi Paqen.

Më 27 prill, në një telefonatë me homologun e tij, ministri i jashtëm i Kinës Wang Yi shprehu mbështetje për Pakistanin dhe tha se Kina po ndjek nga afër zhvillimet midis vendeve.

/rtsh.al/