Regjisori disident iranian u ka kërkuar iranianëve të punojnë për të fituar dhe mbrojtur ‘lirinë’ teksa mori çmimin kryesor në Festivalin e Filmit në Kanë.

Panahi u kërkoi iranianëve të lënë mënjanë dallimet e tyre dhe të punojnë për “lirinë”.

“Unë besoj se ky është momenti për t’u bërë thirrje të gjithë njerëzve, të gjithë iranianëve, me të gjitha mendimet e tyre të ndryshme, kudo që janë në botë – në Iran apo jashtë vendit – të më lejojnë të kërkoj një gjë. Le t’i lëmë mënjanë të gjitha problemet, të gjitha dallimet. Ajo që ka më shumë rëndësi tani është vendi ynë dhe liria e vendit tonë”, u shpreh ai.

Filmi i tij “Ishte thjesht një aksident” tregon historinë e pesë iranianëve të zakonshëm që u përballën me një burrë që besonin se i torturonte në burg.

Panahi, i cili u ndalua të bënte filma në vitin 2010 dhe është burgosur dy herë, argumenton se kinemaja duhet të jetë një hapësirë ​​e shprehjes së lirisë.

“Askush nuk ka të drejtë t’ju thotë se çfarë duhet të bëni dhe çfarë nuk duhet të bëni”, tha ai, sipas komenteve në persisht të përkthyera në frëngjisht në ceremoni.

Ai ishte në Kanë për herë të parë në 15 vjet, pasi ishte ndaluar të udhëtonte më parë.

“Kana është një skenë e madhe dhe ka cilësitë e veta, por ajo që dua me të vërtetë është të ulem në një kinema me njerëz të zakonshëm në Iran dhe të shikoj këtë film. Kjo është gjëja më e rëndësishme”, tha ai për AFP.

/rtsh.al/