Zëvendëspresidenti i SHBA-së JD Vance ka deklaruar se ai beson se programi bërthamor i Iranit është kthyer prapa “shumë vite” nga sulmet e Uashingtonit dhe se operacioni ishte i motivuar nga vlerësimet e inteligjencës amerikane, jo nga ato izraelite.

Vance u shpreh se ndihet “shumë i sigurt se SHBA ka vonuar ndjeshëm zhvillimin e një arme bërthamore të Iranit dhe se ndërsa nuk mund të japë një vlerësim zyrtar, dyshon se do të duhen “shumë, shumë vite” tani para se Irani të arrijë bombën.

I pyetur nëse Presidenti i SHBA-së Donald Trump dha miratimin për operacionin bazuar në vlerësimet e inteligjencës amerikane ose izraelite për aftësitë bërthamore të Iranit, Vance tha se “ishte inteligjenca jonë” që çoi në marrjen e vendimit.

“Sigurisht që ne ndajmë inteligjencën me shumë agjenci, britanike, izraelite e kështu me radhë, por ishte inteligjenca jonë që na motivoi të vepronim”, tha zëvendëspresidenti.

Vance shpjegon se SHBA-të identifikuan se “Irani po prodhonte uranium shumë të pasuruar që ishte në përputhje vetëm me dëshirën e tyre për të ndërtuar një armë bërthamore” dhe ndërsa “sigurisht që ekziston një pyetje e hapur nëse ata ishin javë larg apo nëse ishin muaj larg… ata ishin shumë afër një arme bërthamore”.

Zëvendëspresidenti i SHBA-së thekson se, megjithëse SHBA-të mendonin se bisedimet bërthamore me Iranin ishin disi produktive në mars, deri në mesin e majit, “iranianët dukeshin se po pengonin” negociatat, gjë që ishte “në të vërtetë ajo që fshihej këtu… iranianët ndaluan negociatat me mirëbesim, dhe ky ishte katalizatori i vërtetë” për të marrë vendimin për të sulmuar.

I pyetur nëse SHBA-të do të mbështesnin një vrasje izraelite të Udhëheqësit Suprem të Iranit, Ajatollah Ali Khamenei, Vance thotë se një veprim i tillë “varet nga izraelitët” dhe përsëriti se qëndrimi i SHBA-së është “ne nuk duam një ndryshim regjimi”.

/rtsh.al/