Euro ka vijuar të dobësohet ndaj Lekut, duke arritur nivelin më të ulët të dhjetë viteve të fundit.

Sipas kursit të këmbimit të Bankës së Shqipërisë, java e kaluar u mbyll me 97.22 lekë për një euro.

Kjo tendencë ka ulur vlerën e të ardhurave për qytetarët që paguhen në euro, ndërsa ka sjellë lehtësim për familjet që shlyejnë kredi në këtë valutë.

“Një prezencë e lartë e euros në vend padyshim që ka çuar në zhvlerësimin e saj dhe kemi arritur në nivelet që nuk i kemi parë më parë. Megjithatë duhet theksuar se vitin e fundit ka qenë relativisht stabël,” thotë Dritan Vakaj, drejtori i Shoqatës së Agjencive të Këmbimit Valutor.

Eksperti rendit një sërë faktorësh që po ndikojnë në raportin mes lekut dhe euros.

“Rritja e turizmit dhe remitancat kanë qenë në nivele të larta. E kombinuar me një tkurrje të shpenzimeve qeveritare, si enti kryesor shpenzues, ka ndikuar në ulen e euros”, tregon ai.

Zgjerimi i sezonit turistik po ndihmon në zbutjen e luhatjeve të forta të monedhës evropiane.

“Prezenca e turistëve në vend është shtrirë gjatë gjithë vitit. Nga të dhënat zyrtare janë tregues të drejtpërdrejtë që tregojnë numrin e lartë të turistëve dhe shpenzimeve dhe konsumit nga ana e tyre,” thekson eksperti.

Rënia e euros sjell përfitime për bizneset që importojnë nga eurozona, duke ulur kostot e tyre. Po ashtu, qeveria dhe institucionet publike lehtësohen, pasi kostoja për shlyerjen e borxheve në euro ulet, duke çliruar fonde për shpenzime të tjera.

Gazetar: Omer Saraçi

/rtsh.al/