Ekonomia shqiptare shënoi një rritje të qëndrueshme në tremujorin e dytë të vitit 2025. Sipas të dhënave të publikuara të hënën nga INSTAT, Produkti i Brendshëm Bruto (PBB) në terma realë u rrit me 3.51% krahasuar me të njëjtin tremujor të vitit 2024.

Rritja u nxit kryesisht nga sektori i shërbimeve, ndërsa bujqësia dhe industria shënuan tkurrje, duke zbutur ritmin e përgjithshëm.

Lokomotiva e rritjes shërbimet dhe Administrata Publike

Kontributi më i madh në rritjen e PBB-së erdhi nga sektori i Administratës Publike, Arsimit dhe Shëndetësisë, i cili kontribuoi me +1.65 pikë përqindje. Ky aktivitet shënoi një rritje me një volum prej 15.11%.

Sektori i madh i Tregtisë, Transportit, Akomodimit dhe Shërbimit Ushqimor (që përfshin turizmin) vijon të jetë një shtytës i rëndësishëm, duke kontribuar me +0.47 pikë përqindje dhe duke shënuar një rritje reale prej 2.72%.

Kontribute të larta patën edhe:

Aktivitetet e Pasurive të Paluajtshme (Real Estate): +0.37 pikë përqindje (Rritje reale 7.86%)

Ndërtimi: +0.30 pikë përqindje (Rritje reale 2.68%)

Bujqësia dhe industria nën presion

Në anën tjetër, dy sektorë tradicionalë shënuan kontribut negativ në PBB, duke treguar nevojën për rigjallërim.

Bujqësia, Pyjet dhe Peshkimi -0.46 me një rënie prej 2.49%

Industria, Energjia dhe Uji -0.18, me një rënie prej 1.79%.

Gjithashtu, taksat neto mbi produktet kontribuan pozitivisht me +0.87 pikë përqindje, pas një rritjeje reale prej 6.53%.

Analiza e PBB-së sipas metodës së shpenzimeve tregon se rritja u nxit kryesisht nga kërkesa e brendshme, sidomos nga qeveria:

Konsumi Final i Qeverisë u rrit ndjeshëm me 12.44%.

Konsumi Final i Popullatës shënoi një rritje solide prej 3.88%.

Formimi Bruto i Kapitalit Fiks (Investimet) u rrit me 4.33%.

Në tregtinë e jashtme, Importet (+3.26%) u rritën më shpejt se Eksportet (+0.97%), duke treguar një thellim të deficitit tregtar.

Krahasuar me tremujorin paraardhës (Tremujori I 2025), PBB-ja e përshtatur sezonalisht u rrit me 0.87%, duke ruajtur kështu një trend pozitiv tremujor. Rritjen tremujore e udhëhoqi sektori i Informacionit dhe Komunikacionit (+3.11%) dhe ai i Ndërtimit (+1.34%).

/rtsh.al/