Në Gjykatën e Lezhës u zhvillua sot një seancë rreth 4-orëshe për rishikimin e masave të sigurisë për nëntë personat e vënë nën akuzë lidhur me rastin e ndërtimeve pa leje në zonën e Ranës së Hedhur në Shëngjin. Të akuzuarit po hetohen për veprat penale “shpërdorim detyre”, “falsifikim dokumentesh” dhe “ndërtim i paligjshëm”.

Gjatë seancës me dyer të mbyllura, trupi gjykues vendosi lehtësimin e masave për disa prej të pandehurve.

Vendimet Kryesore

Për Pjetër Tuci, masa e sigurisë u ndryshua nga “Arrest në Burg” në “Arrest në Shtëpi”.

Kurse për Luiza Balën dhe Hekuran Xhinën (Inxhinierë), masa u lehtësua nga “Arrest në Shtëpi” në “Detyrim Paraqitje”.

Për Martin Ndoka (Specialist i Policisë në Komunitet në Shëngjin), u vendos rikthimi i tij në detyrë.

Masat e Konfirmuara

Gentjan Malotaj (ish-Drejtori i Agjencisë Shtetërore të Kadastrës), Artur Shabaku dhe Admir Maxhuni (ish-shefa legjitimimesh) do të qëndrojnë me masën “Arrest në Shtëpi”.

Ndërsa për Flori Gjini dhe Kol Malaj (ish-Drejtues të IDMT-së Lezhë), u la në fuqi masa “Ndalimi për të dalë jashtë shtetit” për veprën “Shpërdorimi i Detyrës”.

Hetimet zbuluan se në këtë zonë turistike janë kryer ndërtime pa leje, të cilat më pas janë legalizuar në kundërshtim me ligjin. Tashmë katër objekte janë vënë nën sekuestro, ndërsa prokuroria vijon hetimet për dokumentimin e rasteve të tjera të paligjshmërive në Shëngjin.

/rtsh.al/