Në Muzeun Historik të Shkodrës u hap sot ekspozita “Arti i Fijes” në jelekë elegancë që magjeps, një prezantim i pasurisë së trashëgimisë etnografike shqiptare. Në këtë ekspozitë u prezantuan 38 jelekë të punuar me mjeshtëri kryesisht të Shkodrës, nga zonat përreth, Jugu i Shqipërisë, Gjakova, Tropoja dhe Berati.

“Është një tematik dhe një titull që nuk na lodhi shumë për t’ja vënë kësaj ekspozite sepse sa herë që hapnim gjatë seleksionimit të jelekëve për ekspozitën që do hapnim, ishte një magjepsje totale. Besoj që ekspozite është një tregues i vlerave dhe traditave”, u shpreh Majlinda Laçaj, Drejtore e Muzeut Historik Shkodër.

“Është koleksioni më i pasur i fondit etnografik, dhe gjëja më e veçantë është një jelek që na është dhuruar dhe është objekt personal i Motrës Tone, motra e Kol Hidromenos dhe pasardhësit e saj përveç jelekut i kanë dhuruar dhe shumë sende të tjera”, tha Ndriçim Mlika, Përgjegjës i Muzeut të Kalasë “Rozafa”.

Ekspozita sjell jo vetëm një vlerë të çmuar historike, por edhe një këndvështrim të ri mbi artin e punimit me fije. Vizitorët do të kenë mundësinë ta shohin këtë ekspozitë nga afër gjatë ditëve në vijim në ambientet e muzeut historik

Gazetare: Blerta Cina

/rtsh.al/