Tre fshatrat e Malësisë së Kurbinit, Skuraj, Gallat dhe Vinjoll kanë dalë nga izolimi për shkak të dëmtimit të urave dhe rrugëve nga reshjet e dendura të shiut një muaj më parë. Falë ndërhyrjes së Bashkisë më mbështetjen e Forcave të Ushtrisë, pas disa javësh punë u arrit të riparohet infrastruktura rrugore dhe të mundësohet lëvizja për banorët e kësaj zone.

“Edhe këtu në zonën e gallatës u krijua një situatë e vështirë përsa i përket infrastrukturës rrugore, saqë arriti të bllokojë dhe fshatrat, t’i bllokojë nga njëri-tjetri. Megjithatë pas stuhisë, me nismën që mori bashkia, me  organizimin e veprimtarinë e punëve të saj, arriti të sjellë grupin e punës që punon me urat, duke sjellë materialet e tjera, blloqe betoni, punëtorët…”, deklaroi Nikoll Balozi, kryetar i fshatrave të Malësisë Kurbin.

Banorët thonë se dëmet e shkaktuara nga moti i keq kanë qenë të shumta. Punëtor dhe mjete të rënda vijojnë të jenë në terren për riparimin e rrugëve të dëmtuara me një gjatësi prej 1 km, ndërsa terreni i thyer malor ka sjellë vështirësi të shumta. Bashkia e Kurbinit ishte një ndër zonat më të prekura nga reshjet me dëme të shumta në infrastrukturë dhe të mbjella.

/RTSH/