Danimarka do të thërrasë ambasadorin e SHBA-së pas njoftimit të presidentit Donald Trump për emërimin e një të dërguari të posaçëm për Groenlandën, territorin autonom danez, që Trump ka kërcënuar ta aneksojë. Ministri i Jashtëm danez, Lars Løkke Rasmussen, ka shprehur zemërimin e tij për këtë emërim, duke e cilësuar si “krejtësisht të papranueshëm”. Ai shtoi se ministria e jashtme daneze do të kërkojë një shpjegim nga ambasadorin e SHBA-së në ditët në vijim.

Trump ka shprehur disa herë interesin për Groenlandën, duke theksuar se ishulli është i rëndësishëm për sigurinë kombëtare të SHBA-së dhe ka refuzuar të përjashtojë mundësinë e përdorimit të forcës për ta siguruar atë. Ai njoftoi emërimin e guvernatorit të Luizianës, Jeff Landry, si të dërguarin special të SHBA-së për Groenlandën, duke thënë se Landry do të “përparojë fuqishëm interesat e sigurisë dhe mbrojtjes” për SHBA-në dhe aleatët e saj.

Udhëheqësit e Danimarkës dhe Groenlandës kanë theksuar vazhdimisht se ishulli nuk është në shitje dhe se do të jetë Groenlanda që do të vendosë për të ardhmen e tij.

Rasmussen theksoi se emërimi i dërguarit të posaçëm të SHBA-së konfirmon interesin e vazhdueshëm amerikan për Groenlandën, por ai kërkoi respekt për integritetin territorial të Mbretërisë së Danimarkës. “Ne këmbëngulim që të gjithë – përfshirë SHBA-në – duhet të tregojnë respekt për integritetin territorial të Mbretërisë së Danimarkës”, përfundoi ai.

/rtsh.al/