Lojërat Olimpike Dimërore të Milano-Cortina do të kenë një prani të diskutueshme sigurie. Burime zyrtare nga Ambasada e SHBA-së në Romë dhe agjencia “Associated Press” kanë konfirmuar se agjentët e Emigracionit dhe Doganave të SHBA-së (ICE) do të jenë të pranishëm në Itali për të mbështetur operacionet e sigurisë gjatë eventit.

Ky konfirmim vjen mes një klime të tensionuar, pas raportimeve për dhunë nga agjentët federalë në Minneapolis dhe deklaratave të forta të Kryebashkiakut të Milanos, Giuseppe Sala.

Siguri diplomatike, jo imigracion

Zyrtarë amerikanë kanë saktësuar se agjentët (pjesë e degës së Hetimeve të Sigurisë Kombëtare – HSI) do të kenë rol mbështetës për Shërbimin Diplomatik të Sigurisë dhe nuk do të kryejnë asnjë operacion zbatimi të ligjit për emigracionin në territorin italian. Prania e tyre lidhet me delegacionin e lartë amerikan që do të marrë pjesë në ceremoninë e hapjes më 6 shkurt, i kryesuar nga Zëvendëspresidenti JD Vance dhe Sekretari i Shtetit Marco Rubio.

Përplasja

Lajmi ka shkaktuar reagime të ashpra në Milano. Kryebashkiaku Giuseppe Sala e ka kundërshtuar hapur praninë e tyre, duke iu referuar ngjarjeve të fundit në SHBA.

“Kjo është një milici që vret, një milici që hyn në shtëpitë e njerëzve… Është e qartë se ata nuk janë të mirëpritur në Milano, pa dyshim,” deklaroi Sala për RTL Radio 102.

Reagimi i tij vjen pasi televizioni italian RAI transmetoi pamje të agjentëve të ICE duke kërcënuar gazetarët italianë në Minneapolis, si dhe raportimeve se oficerët federalë kanë vrarë dy protestues gjatë demonstratave atje në javët e fundit.

Nga ana tjetër, Ministri i Brendshëm italian, Matteo Piantedosi, ka mbajtur një qëndrim më të butë, duke deklaruar se “nuk sheh ndonjë problem” me praninë e tyre, ndonëse fillimisht Ministria pretendoi se nuk kishte konfirmim zyrtar.

/rtsh.al/